Университеттер

Satbayev University

Алматы қаласында орналасқан Satbayev University – Қазақстандағы ең байырғы да беделді техникалық университеттердің бірі және тау-кен мен мұнай бизнесі саласындағы әзірлемелерімен танымал. 1934 жылы Қазақ тау-кен металлургия институты ретінде құрылған. Университет 80 жылдан астам уақыт бойы Қазақстандағы технологиялық прогресс пен көшбасшылықтың синонимі болып келеді. Университетте қазір 9 мыңнан астам студент білім алады. Сәтбаев университетінің визиттік карточкасында техникалық мамандықтар басым болғанымен, бұл сәулет және менеджмент саласында да білім алуға болатын көпсалалы университет.

Студенттер білім алумен қатар университеттің қоғамдық өміріне де белсене араласады. Сенбіліктер, экологиялық акциялар, ағаш отырғызу – осы арқылы студенттер қоғам алдындағы экологиялық жауапкершілігін танытады.

2022 жылы Сәтбаев Университеті алғаш рет Алматы қаласының ЖОО арасында ЭКО ROCK FESTIVAL өткізіп, осы акция аясында қонақтар мен студенттер 84 келідей тұрмыстық қалдық жинады.

Университеттің қағидатты ұстанымы – қоғамның экологиялық мәдениетінің өсуіне ықпал етуге бағытталған экологиялық ұйымдарымен ынтымақтасу.

Қ.Жұбанов атындағы Ақтөбе өңірлік университеті

Қ.Жұбанов атындағы Ақтөбе өңірлік университеті – еліміздегі жетекші жоғары оқу орындарының бірі. 1966 жылы құрылған. Университет тарихы ұлы бабалардың жетістіктерін, білім мен ғылым саласындағы өзіндік бай тәжірибесін таңдаған.

Zhubanov University гуманитарлық және техникалық ғылымдарды, ұлттық дәстүрлерді құрметтеуді, адалдықты, қоғамға қызмет ету мен өз ісіне адалдықты, жеке тұлғаны жетілдіруге ұмтылуды біріктіретін классикалық жоғары оқу орны ретінде дамып келеді.

Көпсалалы классикалық университет екі жыл қатарынан Университеттердің жалпы рейтингінде (Қазақстан Республикасының аккредиттеу және рейтингтің тәуелсіз агенттігі) 4-ші орынға ие болды. 15 мыңнан астам студент білім алады.

Дамыған материалдық-техникалық базасы, тәжірибелі оқытушылар, академиялық ұтқырлық бағдарламасы бойынша шетелдік жоғары оқу орындарында білім алу мүмкіндігі – осы және тағы да басқасы университетке бүкіл Қазақстан мен Батыс өңірін дамыта алатын жоғары білікті мамандарды даярлауға жол ашады.

«ZHUBANOV ЖЫЛУЫ» волонтерлар клубының студенттері «Біз тазалықты қолдаймыз» экологиялық акциясы аясында өткен «Eco - plogging» марафонында II орынға ие болып, сонымен бірге еріктілердің «Ecohiking» халықаралық форумында сертификатпен марапатталды.

Тұран - Астана университеті

"Тұран-Астана" университеті – гуманитарлық-экономикалық бейін, дизайн, сервис және туризмнің білім беру бағдарламалары бойынша кадрлар даярлауды табысты жүзеге асыратын, өз қызметінің 25 жылдан астам тарихы бар өңірдегі ең ірі жоғары оқу орындарының бірі.

"Тұран-Астана" университеті 1998 жылғы 15 мамырда құрылды, дайындық қазақ және орыс тілдерінде жүргізіледі, оқыту нысаны – күндізгі.

С.Сейфуллин атындағы Қазақ агротехникалық университеті (Астана)

С.Сейфуллин атындағы Қазақ агротехникалық университеті 1957 жылы құрылған және Қазақстан Республикасы мемлекеттік индустриялық-инновациялық даму бағдарламасы жобалары бойынша кадрлар дайындайтын еліміздің іргелі 10 жоғары оқу орнының қатарында.

Басым бағыт ретінде «Ауыл шаруашылығы машина жасау» мен «Азық-түлік өнімдерін өндіру» секторлары қарастырылған. С.Сейфуллин атындағы Қазақ агротехникалық университетінің серіктесі – өзімен бірге жаңа білім беру бағдарламаларын әзірлеп жатқан, әлемдегі ауылшаруашылығы профиліндегі жетекші - Дэвистегі Калифорния университеті (UCDavis, АҚШ). Қазіргі уақытта университетте 44 кафедра жұмыс істесе, 10 мыңнан астам студент білім алып отыр.

С.Сейфуллин атындағы Қазақ агротехникалық университеті QS WorldUniversityRankings® 2014/15 жүргізген әлемдік университеттер рейтингінің қорытындысы бойынша 701 үздік университеттің қатарына енген; Бірегей еуропалық білім беру кеңістігін қалыптастыруға негіз бола алатын Университеттердің Ұлы Хартиясының толыққанды мүшесі.

2009 жылдан бастап экология кафедрасында қоршаған ортаны қорғау шараларын, студенттердің ғылыми-зерттеу жұмыстарын, сонымен қатар әртүрлі экологиялық акцияларды насихаттайтын «Ecolife» студенттік экологиялық клубы жұмыс істейді. Жыл сайын «Экология» мамандығының студенттері мен «Ekolife» клубының мүшелері «Байтақ болашақ» республикалық экоальянсы ұйымдастыратын «Әр қазақстандыққа бір тал – 18 миллион талшыбық отырғызу», акциясына белсене араласып, «Жаһандық экологиялық проблемалар» тақырыбында дөңгелек үстелдер өткізеді.

Қазақ ұлттық аграрлық зерттеу университеті (Алматы)

Қазақ ұлттық аграрлық зерттеу университеті – ауыл шаруашылығы салаларына мамандар дайындайтын инновациялық жоғары оқу орны, Қазақстандағы аграрлық білім мен ғылымның көшбасшысы.

Қазақ ұлттық аграрлық зерттеу университеті 1929 жылы құрылған.

Ғылыми-зерттеу университетінің басты мақсаты – ғылым мен өндірісті интеграциялау, іргелі және қолданбалы ғылыми зерттеулер мен ғылыми-техникалық жобаларға қатыса отырып, біліктілігі жоғары кадрларды даярлау.

Университет өз ресурстарын шоғырландыра білсе, шын мәнінде елдің осы саладағы бәсекеге қабілеттілігіне айтарлықтай игі ықпал ететін агроөнеркәсіптік дамудың, білім берудің, ғылым мен инновациялық ортаның ордасына айналып отыр.

Бүгінгі таңда университет шетелдердегі жетекші университеттермен, ғылыми орталықтармен ынтымақтаса отырып, әлемдік ғылыми кеңістікке табысты түрде интеграциялануда, климаттың өзгеруі, қоршаған ортаны қорғау, азық-түлік қауіпсіздігі, ауызсу тапшылығы сынды басқа да өзекті мәселелер бойынша халықаралық бағдарламаларды жүзеге асырып жатыр.

Университет базасында құрылған «Extension» халықаралық моделі бойынша «Фермерлердің жоғары мектебі» еліміздің агроөнеркәсіптік кешеніндегі шаруа қожалықтарының басшылары мен қызметкерлеріне кеңес беру мен білім беру қызметтерін көрсетеді.

Е.Бөкетов атындағы Қарағанды мемлекеттік университеті (Қарағанды)

Академик Е.А. Бөкетов атындағы Қарағанды ​​университеті 1972 жылы құрылған.

Университеттің миссиясы – рухани құндылықтарды сақтау, білім тарату, үздік білім беру тәжірибесі мен ғылыми-зерттеу бағдарламалары негізінде оқытудың инновациялық тәсілдерін енгізу.

Қазіргі таңда университетте 14 мыңдай студент, магистрант пен докторанттар білім алуда. Кадрларды даярлау 9 сала, 28 бағыт бағыт бойынша бакалавриаттың 96, магистратураның 66, докторантураның 16 білім беру бағдарламалары аясында жүзеге асырылады.

Университет іргелі, негізгі және экономикалық пәндер бойынша кәсіби білімі бар, жаңа технологиялар мен еңбек талаптарына бейімделген, қазіргі заманғы жағдайда кәсіби қызметтің теориялық және практикалық мәселелерін шығармашылықпен шешуге қабілетті экология саласындағы бакалаврларды сапалы дайындауды жүзеге асырады.

Мұхтар Әуезов атындағы Оңтүстік Қазақстан университеті (Шымкент)

Шымкент қаласындағы Мұхтар Әуезов атындағы Оңтүстік Қазақстан университеті – 13 факультетте 76 техникалық және гуманитарлық мамандықтар бойынша білім беретін мемлекеттік көпсалалы жоғары оқу орны. Мұнда 30 мыңға жуық студент оқиды

1943 жылы КСРО Халық Комиссарлар Кеңесі Қазақ КСР-і Шымкент қаласында құрылыс материалдары технологиялық институтын ұйымдастыру туралы № 679 қаулысын қабылдайды. 1964 жылы институт атауы өзгеріп, Қазақ химия-технологиялық институтына айналады, ал 1998 жылы гуманитарлық университетпен біріктіріліп, Мұхтар Әуезов атындағы Оңтүстік Қазақстан мемлекеттік университеті болып қайта құрылды.

2022 жылы UI GreenMetric World University Rankings рейтингтік агенттігі GreenMetric-2022 халықаралық университеттер рейтингінің нәтижелерін жариялаған кезде М.Әуезов атындағы Оңтүстік Қазақстан университеті әлемнің үздік университеттерінің қатарына еніп, 1050 ЖОО арасында 260 орынға ие болды.

Ал 2022 жылы қазақстандық студенттер «EcoStudentKZ» экологиялық акциясын бастаған кезде, эстафетаны бірінші болып шымкенттіктер қолға алды. Олар Қошқар ата өзені жағалауын құрғақ шөптен, бос бөтелкелер мен басқа да қоқыстардан тазартты.

Акцияның мақсаты – өскелең ұрпақта экологиялық сана қалыптастыра отырып, студенттерге өз қалаларында және әрқайсымыз өзіміз тұратын мекен үшін не істей алатынымыз туралы көбірек білуге ​​септесу.

Абай атындағы Қазақ ұлттық педагогикалық университеті (Алматы)

1928 жылы негізі қаланған Абай атындағы Қазақ ұлттық педагогикалық университеті бүгінде еліміздегі экономиканың барлық дерлік саласы үшін оқытушылар мен ғылыми кадрларды даярлайтын жетекші оқу орны. Білім берудің жоғары сапасы, Қазақстан Республикасының үздік ЖОО арасындағы лайықты орны мен педагогикалық жоғары оқу орындарының рейтингінде бірінші орынға ие болуы, еңбек нарығында өз орнын таба алатын жоғары білікті мамандар даярлаудың маңызды міндеттерін қоюға және шешуге мүмкіндік береді. Осының көпшілігі Қазақстанның одан әрі даму стратегиясын айқындай отырып, университетті әлемдік аренаға шығарады.

Басты міндет – жаңа формациядағы, бәсекеге қабілетті, озық ойлы, өзіне де қоғамға шығармашылық тұрғыда, сындарлы көзқараспен қарайтын педагогикалық сапалы кадрлар дайындау.

Университет «Жасыл экономика» тұжырымдамасын мен «XXI ғасырдағы тұрақты дамудың жаһандық энергоэкологиялық стратегиясын» қолдау үшін енгізілген «Жасыл көпір» сияқты серіктестік бағдарламаларын барынша қолдайды.

Осындай кезекті шаралардың бірі география және экология кафедрасының профессорларымен бірге 4 курс студенттері ұйымдастырған көгалдандыру жөніндегі акция. Бұл үшін алдын ала көшеттер дайындалып, бөлме гүлдері өсімдіктер отырғызылды. Оған қоса ботаникалық бақтан сирек кездесетін өсімдіктер сатып алынды.

2022 жылы Ғылым онкүндігі аясында Жаратылыстану және география институтында 1 курс магистранттарының қатысуымен «Қазақстан Республикасының тұрақты дамуы үшін биологиялық білім беруді экологияландыру» тақырыбында жоба байқауы ұйымдастырылды.

Назарбаев Университеті

Назарбаев Университеті (НУ) – бұл Астана қаласында орналасқан халықаралық ағылшынтілді зерттеу университеті.

Қазақстан Республикасы Тұңғыш Президентінің бастамасымен 2010 жылы құрылған Назарбаев Университеті халықаралық зерттеу университеті болуды өзіне мақсат тұтқан еліміздегі жоғары білімнің флагманы. Бұл Қазақстандағы қызметі автономдық пен академиялық еркіндік қағидаттарына құрылған алғашқы университет. Университетке 2011 жылы автономды мәртебе берілді.

НУ-дың басты басымдығы – студенттер. Университетке қабылдау саясаты академиялық жетістіктер негізінде ілгерілету, академиялық адалдық пен сындарлы ойлау дағдылары түлектер табыстылығының кепілі болды. НУ әлі де дами береді, сапаны да сөзсіз сақтайды. Университет 2025 жылға қарай студенттер санын 6 мыңнан 8 мыңға дейін көбейтуды, шетелдік студенттер үлесін 10%-ға дейін арттыруды көздеп отыр.

НУ профессорлық-оқытушылар құрамы (ПОҚ) әлемнің 58 елінің өкілдерін қамтиды. НУ-да 521 профессор (оның ішінде 34 докторант бар) мен 76 оқытушы-ассистент бар.

Назарбаев Университеті ашылғалы бері жасыл технологияларды дамытуға бағыт алған. Университет қоршаған ортаға құрметпен қарауды дамыта отырып, экологиялық күн тәртібін алға жылжытады. 2016 жылы қоршаған ортаны аялау мәдениетін қалыптастыру мен университеттің экологиялық тұрақтылығын дамыту мақсатында Green Campus жобасын іске қосты. Бүгінгі таңда жобаға Green Campus кеңсесі, Green Campus университеттік комитеті мен NU Green Society студенттер қауымдастығы қатысады

Кеңсенің негізгі міндеттеріне университеттің тұрақты даму саласындағы барлық қызметін үйлестіру, стратегиялық құжаттар әзірлеу, экологиялық саясат пен қоршаған ортаны қорғау жобаларына байланысты іс-шараларды жүзеге асыру жатады. Green Campus кеңсесі 50-ден астам мүшесі бар, студенттік ұйым болып табылатын NU Green Society ұйымымен өте тығыз жұмыс істейді. Университет студенттердің экологиялық бастамаларын қолдайды, мысалы, жасыл апталық, шеберлік сабақтары, экосаяхаттар және т.б. Ал Green Campus комитеті – идеялар мен жобалар қалыптастырылатын және оларды іске асыру талқыланатын «ойлау орталығы» десек те болады. Сондай-ақ бұл жерде университет қалашығының экологиялық өміріне қатысты өз шешімін күткен көкейкесті мәселелер талқыланады. Комитет құрамына профессорлар, ғылыми қызметкерлер, студенттер, университеттің еншілес және құрылымдық бөлімшелерінің басшылары кіреді.

2019 жылы Кеңсе кампусте жүргізіліп жатқан, тұрақты даму жөніндегі студенттер мен қызметкерлердің инновациялық жобалары мен зерттеулерін қолдауға бағытталған Sustainability Living Lab бағдарламасын іске қосты. Осы бағдарлама аясында бүгінгі таңда бес бірдей жоба жүзеге асырылуда: оранжерея құру, фермер бұрышы, биодизель отыны, пайдамат пен green box құру.

Green Campus үшін таяу келешектегі экология саласындағы екі басым бағыт: парниктік газдар шығарындыларын азайту және қалдықтарды басқару жүйесін жетілдіру ерекше бөле-жарып атап өтілді. Осы мақсаттарға қол жеткізу үшін Кеңсе көміртегі қарқындылығын төмендетудің бес жылдық жоспарын әзірлеуде (Көміртекті басқару жоспары), сонымен қатар кампуста әртүрлі қалдықтарды жинау жүйесі енгізіліп жатыр: макулатура, пластик, шыны, батареялар, сынапқұрамды шамдар және басқалары.

«Д.Серікбаев атындағы Шығыс Қазақстан техникалық университеті» КЕАҚ (Д.Серікбаев атындағы ШҚТУ)

«Д.Серікбаев атындағы Шығыс Қазақстан техникалық университеті» ШҚТУ КЕАҚ. (Д.Серікбаев атындағы ШҚТУ) – Шығыс Қазақстанның ірі әкімшілік өнеркәсіптік орталығында, Өскемен қаласында орналасқан қазақстандық базалық инженерлік жоғары оқу орны, жаңа білім мен инновациялар шығаратын орталығы. Бұл әлемдік деңгейдегі ғылыми-зерттеу техникалық университеті – озық инженерлік білім беру және жоғары технологиялық зерттеулер орталығы. Университет Ресей, Қытай және Моңғолия шекараларының түйіскен жерінде орналасқан, жоғары білікті инженерлік кадрларды даярлауда 60 жылдық тарихы бар.

Университеттің миссиясы – Біз білім, ғылым мен индустрияны біріктіре отырып, жоғары технологиялық болашақ жасаймыз.

Университеттің декларацияланған құндылықтарының бірі «Қоршаған орта мәдениеті» тірі әлемнің әр элементінің құндылығын түсіну және оның іс-әрекетін ғаламшардың әл-ауқатына ықтимал салдары тұрғысынан бағалау. Орнықты даму мақсаттарын (ОДМ) іске асыру ЖОО стратегиясына енгізілген.

Д.Серікбаев атындағы ШҚТУ-да 2018 жылдан бастап тұрақты даму қағидаттарын пайдалана отырып, университет қызметінің барлық аспектінде экологиялық саясатты әзірлеу және іске асыруды мақсат тұтқан Green Campus экологиялық жобасын іске асырып жатыр. Д.Серікбаев атындағы ШҚТУ «жасыл» бастамаларды және университеттерде ОДМ-ды ілгерілетуді белсенді қолдайды.

"Нархоз университеті" КЕАҚ

Нархоз университеті 1963 жылы үлкен жоспарлар, ауқымды реформалар және үлкен жетістіктер дәуірінде құрылды. Уақыт рухына сай, университеттің дамуы тез болды - құрылғаннан бастап Бүкілодақтық танылуына дейін бірнеше жыл өтті.

Соңғы екі жылда униерситетте университетті басқару механизмдері мен білім беру үдерісі белсенді түрде реформалануда. Мысалы, мектептер мен факультеттер даму мәселелерінде көбірек автономдыққа ие болды, электрондық құжат айналымының белсенді интеграциясы жүруде, оқытушылардың әлеуетін дамыту мақсатында оқыту сапасын мониторингтеу және бағалау механизмі енгізілді. Жаңашылдық оқыту сапасын арттыру, жұмыс тиімділігі мен Университеттің беделін арттыру түрінде бірден нәтиже берді.

Нәтижесінде, бүгінде Нархоз университеті негізгі міндеті жаңа буынның жоғары білікті мамандарын даярлау болып табылатын Қазақстанның жетекші жоғары оқу орындарының бірі ретінде белгілі. Олардың білімі мен дағдылары түлектер қоғамдастығының және өзекті ғылыми зерттеулер нәтижелерінің кең қолдауымен жекелеген қаланың, Қазақстан Республикасының, Орталық Азия өңірінің немесе жалпы әлемнің экономикасын, бизнесін және қоғамын дамытуға көмектесетін болады.

Нархоз университеті оқу бағдарламаларын, стратегиялық құжаттарды, зерттеулерді және кампус қызметін қоса алғанда, университет өмірінің барлық аспектілеріне тұрақты дамуды енгізген өңірдегі алғашқы жоғары оқу орындарының бірі болды. Кейде тұрақтылық мәселелері шешілмейтін болып көрінгенімен, бәріміз үміттенетін және қалайтын жақсы әлемді құру үшін әрқайсымыздың күш-жігеріміз қажет болады. Тұрақты Қазақстан Зерттеу Институты (SKRI) Нархоз Университетінің басшылығымен, қызметкерлерімен және студенттерімен бірлесе отырып Нархоз университетінде және Алматыдағы біздің кең қоғамдастықта қызмет ете отырып, осы көзқарасты жүзеге асыруға өз үлесін қосуға тырысады. Біз сондай-ақ олардың іс-әрекетінің негізі ретінде сөзсіз тұрақтылықты қамтамасыз ететін болашақ жұмысқа студенттерді дайындауды мақсат етеміз. Нархоз университеті тұрақты дамуға басымдық береді және өз қызметінің негізгі бағыттарымен, негізгі қағидаттарымен және құндылықтарымен синергияда ТДМ іске асырылуын қолдайды.